Mesra? Sopan? atau Tidak?

Apo yg Sopit nak tulih ni sebonar eh adolah tontang sikap. Sopit dah terkono banyak kali dah, dikodai makan, di stesen minyak dan dipasaraya. Heran boto lah kalau orang yg berniago tak jago adab sopan dan tak mesra pelanggan.

Situasi pertamo...kek kodai makan..ado ko patut, dah lah kito ni selalu poei kodai dio, dah macam pelanggan totap dah tapi tak do langsung nak hargai pelanggan. Bilo kito masuk kodai dio tu, dio macam endah tak endah yo, lobih baik dio layan sms dari melayan kito, bilo kito dah terlambai-lambai, barulah terhegeh-hegeh deh datang kek mejo kito, tanyo nak makan apo.Bilo time nak bayar pulak..kito ni bayar tu utk duit gaji dio jugakkan..tapi bilo kito bayar tu takdo langsung nak ucap terimo kasih..takdo langsung..dalam mulut tu ado omeh gak eh..takut lak,kang bilo bukak mulut tu, melambak lak omeh tu keluar..nanti curik eh kek orang..Dah lah tak ucap terimo kasih, tak pandang langsung kek kito, macam kito ni barua pulak, poei makan kek kodai dio tu menyusah kan dio..osah tak sodar diri boto. Dulu kodai ni bukak sampai tongah malam, tapi sekarang ni Sopit tgk kodai tu bukak sampai potang yo. Tak tau lah sobab takdo pekojo ko atau pun takdo pelanggan. Tapi, bagi Sopit kalau nak berniago tu jago lah adab..tak luak kalau ucap terimo kasih, malah pelanggan akan lobih sonang ati untuk datang dan dah tontu akan promosi kek orang lain pulak. Menambahkan pendapatan lagi ado.

Situasi keduo..stesen minyak Petronas (KLIA nun)..ini suami Sopit yg kono, abih dibahaso eh budak tu..cerito eh camni, suami Sopit ni nak mengisi minyak RM30, dio hulurlah duit RM50,budak tu dgn suaro brutal eh tanyo "duit kocik takdo ko?"...eh ini bukan boli gulo-gulo 20 sen hulur RM50..tapi nak isi minyak..kek situ beratus keto dtg isi minyak takkan lah takdo duit tukar..ok lah suami Sopit masih sabar lagi..sabar..sabar..Suami sopit cakap lagi.."Pam 2 dik"..budak tu bulih lak jawab.."Pam 2 mana?"..ehhh ini dah lobih ni..suami Sopit pun tunjuk lah..ok lah..budak tu pun bueklah tokan-tokan kek mesin dopan dio tu..peh tu..time nak pulangkan duit baki, dio lotak yo ateh mejo tu..dgn takdo ucap terimo kasih eh..apo laei...jeng..jeng..jengg...suami Sopit yg dari tadi dah memondam raso..melotup lah..."Dik..kau ni kan memang kurang ajar tau tak, kau ingat ni barua ko ni, terimo kasih pun takdo, ini bukan utk orang lain ni doh..utk gaji kau yo ni.."..Sopit yang tunggu dalam kereto pun bulih dongar suaro dio marahkan budak tu..punyo lah kuek dio marah kan budak tu..namo yo kedai mesra..tapi budak tu tak ambik semangat kodai tu..Sopit kato lah agak eh dio gaduh ngan boypren dio tak..tak pun senggugut ko mano tau..lagi panjang lah syarahan suami Sopit tu...angin bona deh ngan budak tu..he..he...

Situasi ketigo..kek Tesco..ni Sopit sendiri yg kono..time bayar tu..patut eh ado baki tapi baki tu ado 5 sen kek blakang..tapi bilo cashier tu pulangkan, takdo pulak 5 sen tu, Sopit pun tanyo lah "5 sen mano?"..budak tu jawab "5 sen takde kak" dengan muko selambo..ehhh..ini bukan cam zaman dulu..bulih burn yo..Sopit pun cakap lah "Eh..mano bulih takdo, 5 sen tu duit tau, ado nilai, laku lagi"..budak tu terkojut deh..dio ingat muko cam budak sekolah cam Sopit ni (chehh perasan lak) bulih diperkotak-katikkan gak eh..cubo kok dio yg kono..Sebonar eh bukan 5 sen tu yg Sopit nak pertahankan bona doh, tapi sikap tu, mano bulih jawab camtu kek customer, kalau takdo kek dio, tanyo lah kek kaunter sebolah tu. Ini tidak selambo dek yo dia jawab cam tu. Mesti org yg beratur belakang Sopit tu kato apo lah budak ni, 5 sen pun nak berkiro. Bukan camtu, jangan kito pandang rondah pado nilai duit tu. Walaupun 5 sen, bulih digunokan untuk bondo lain. Sekarang ni mmg zaman duit. Jimat..walaupun 5 sen..Kito sebagai customer ado hak, jangan biarkan orang lain pijak hak kito tu. Kalau dari awal kito dah berlombut dan bagi ruang utk org pijak hak kito tu, jgn lah kito duk berteriak, melaung memperjuangkan hak padohal kito sendiri yg tak tau hak kito..



alamak..stress pulak tetongahari ni...rehat dulu lah..cool..jom berondammm...